№106 "Қайнарбұлақ" жалпы білім беретін мектебінің тарихы
Мектеп тарихы
Елдің мәдениеті мен рухани өсуі мектептен басталады. Алғашқы мектеп Оңтүстік Қазақстан облысы Арыс ауданына қарасты Қайнарбұлақ елді мекенінде 1932 жылы салынған. Мектеп 2 сынып бөлмесінен, коридордан және мұғалімдер бөлмесінен тұратын төбесі ақ түнікемен жабылған биік ақ үй болғандықтан ел оны «Ақ мектеп» деп атаған. Білім берудің бағыттарына сәйкес бастауыш мектеп білім беру жүйесінің алғашқы сатысы. Сондықтан мектеп № 48 «Қайнарбұлақ» ауылдық бастауыш мектбі деп аталды. Мектептің алғашқы директоры Қондыбаев Сапарбай 1932-1933 жылдары бастауыш сыныпта ұстаздық еткен. Ал 1934-1936 жылы Оразбаев Ахмет мектеп директоры болған. Бастауыш мектептер 1941 жылы 4 жылдық болып өзгерді. Сол кездегі әлеуметтік-экономикалық жағдайға байланысты халықтың көпшілігі үшін Бастауыш мектеп білім беру жүйесінің алғашқы және соңғы сатысы ретінде қызмет етті.
1964 жылы ел экономикасының жедел қарқынды дамуы барысында «Қайнарбұлақ» совхозының директоры Тоян Көпеновтың басшылығымен, Қайнарбұлақтан мектеп үйін салуды ұйғарды. 1965 жылы пайдалануға берілгенге дейін 1932-1933 оқу жылынан бастап Қайнарбұлақ және Таскешу елді мекендерінің балалары бір мектепте оқыды. 1936-1964 жылдар арасында мектепке басшылық жасаған Мырзаев Сапарбек білім-білігі, үлгі-өнегесімен мыңдаған шәкірттерінің есінде мәңгілікке сақталған. Сондықтан Қайнарбұлақ орта мектебінің ұжымы Педагогикалық кеңестің қаулысымен мектептің бір сыныбына Мырзаев Сапарбек ұстаздың есімін беріп мәңгі ест қалдырды. 1965 жылы Қайнарбұлақ елді мекенінің ортасынан совхоз кеңсесі үшін салынған екі қабатты ғимараты сегіз жылдық жаңа мектептің оқу жайы етіп пайдалануға берілді. Мектеп директоры Жақыпов Шәріпбек болды. Ұстаздың ұлағатты ісіне құметпен қарап бір сыныпқа есімі берілді.
1995-1996 оқу жылы соңында Қайнарбұлақ орталау мектептің ата-аналар ұйымы төрағасы, қаламгер ақын, физика пәнінің мұғалімі Жұрынтай Әбілдаұлының ұсынысымен елді мекеннің ата-аналарының жалпы жиналысында халқымыздың «Асар» дәстүрімен мектеп жанынан қосымша 6-сынып бөлмесі мен ұзындығы 3,4 м ені 8 м болатын жаңа құрылысты салуға шешім қабылдап, мектеп директоры Уәш Бөрібекұлы және ата-аналар, мектеп ұжымы бірауыздан қолдап, қуаттап маусым айында қызу жұмыс басталып, 1997 жылы аяқталып жаңа оқу жылына дайын болды.
1998 жылы 8 Мамыр аудан әкімінің орынбасары Мәліков Амангелді, Сайрам ауданы әкімінің бұйрығы жарияланып, осы бұйрық негізінде «Қайнарбұлақ» орталау мектебі енді орта мектеп санатында жұмысты жалғастыратыны тұжырымдалды. Бұл күн елді мекен тарихында ел сеінде мәңгі сақталатын күндердің бірі еді.
2001 жылдан 2011 жыл аралығында мектеп директоры болып «Ұлағатты ұстаз» Қабылбеков Сырлыбек қызмет атқарып, балалардың білім алуына, ұстаздардың білім-білігіне үлкен үлес қосқан азаматтардың бірі болған. Қабылбеков Сырлыбек ұстаздың басшылығымен Облыстық бюджет есебінен 2007 жылы жаңа 2 қабатты 250 орындық ғимараттың іргетасы қаланып, 2008-2009 оқу жылында 25 қазан Республика күні қарсаңында жаңа мектептің лентасы қиылып шәкірттердің білім алуына жағдай жасалды. Бұл күн Қайнарбұлақтықтардың ең қуанышты да бақытты күндерінің бірі саналады.
2011 жылдың ақпан айынан «Қайнарбұлақ» мектебінің түлегі Тағаев Абзал Абданұлы мектеп директоры қызметін атқарып келеді. «Жас келсе іске», «Ұстаздан шәкірт озар» деген халық мақалы бекер айтылмаған, өз білім-білігімен, жалынды ұсыныстарымен мектепті жоғары деңгейде көрсетіп жүрген мектеп басшыларының бірі. Ұстаздары мен шәкірттері Халықаралық, Республикалық деңгейдегі ғылыми жоба, олимпиада, жарыстарда жүлделі орындарды иеленіп және де жалғасын тауып келеді.
Шымкент Қазақстанның миллионнан аса тұрғыны құраған Мегаполисті аймақтарының бірі. Сайрам ауданына қарасты №48 «Қайнарбұлақ» жалпы орта мектебі, 2014 жылдың қаңтар айынан Шымкент қаласы Қаратау ауданына қарасты, №106 «Қайнарбұлақ» жалпы орта білім беретін мектеп, коммуналдық мемлекеттік мекемесі аталды.
Мектепке басшылық жасаған директорлар тізімі:
- Қондыбаев Сапарбек (1932-1933жж.)
- Мырзаев Сапарбай (1934-1964жж.)
- Шәріпбек Жақыпұлы (1965-1973жж.)
- Колхоз Төлтебаев (1973-1988жж.)
- Ағабеков Аманбек (1988-1989жж.)
- Қабылбеков Сырлыбек (1990-1995жж.)
- Бөрібеков Уәш (1997-2001жж.)
- Қабылбеков Сырлыбек (2001-2011жж.)
- Тағаев Абзал 2011жылдан
Мектеп тарихында, сонау бір ғасыр бұрын құрылған «Ақ мектептен» мыңдаған шәкірттер тәрбиеленіп, білім нәрімен сусындаған, әр-түрлі саладағы ғалым, қаламгер ақындар, әкім-басшылар, шетелдерде білікті қызмет атқарған, «Алтын белгі» иегерлерді шыңдаған «Қара шаңырақ» өз жалғасын тауып, ұрпақтан-ұрпаққа берілген білім білім ордасы мәңгілік қызмет ете берсін!